Tankimik piginnittutut akisussaaffigivat uuliamut tanki aamma uuliakoortoqassagaluarpat illit akiligassannik uuliarluernerup salinneqarnissaa.

Tankit misissoruk
Uuliakoornaveersaarit. Akuttunngitsumik tankit ruujorimullu attavii misissortakkit, taamaaliornikkut maangaannartitsinissaq annikillisinneqassaaq.

Misissugassat:

• Tanki ruujorimullu attavii, kiisalu immertarfia silaannaajarfia uuliakoorsimanersut misissukkit.
• Tanki ruujorimullu attavii ajoquteqarnersut misissukkit (manngertorneq, singarnerit il.il.).
• Tanki milinngannginnersoq misissoruk (issutaqannginnersoq, sannakoqannginnersoq, naasortaqannginnersoq il.il.).
• Aputip sermillu illup qalianit nakkaassinnaaneri misissoruk aamma tankip aporneqarsinnaanera il.il.
• Ulikkaartoornissamut kalerrisaarut (siggartaat allaluunniit) pissusissamisoornersoq misiliguk, taassumalu immiisumit tusaaneqarsinnaanera.
• Uuliap utersaartoorsinnaanera misissoruk, imaappoq, immiinerup kingorna ruujorikkut aniasoqarnersoq. Allallu pisariallit misissorlugit.
• Kiassaateqarfivit ikkussorneqarnera eqqortumik pisimanersoq nalornissutigigukku kiassaateqarfimmik ikkussuisartoq attavigiuk.